Kiroldegira 100 lagun baino gehiago hurbildu ziren. “Pasioz eta harrotasunaz betetako arratsaldea izan zen. Handiek eta txikiek partekatu zituzten irribarreak eta batez ere kirol-izpiritua”, azaldu dute elkartearen blogean. Derioko kiroldegia argazkilaritza-estudio inprobisatua bihurtu zen atzo arratsaldean. DAT taldeko kideek atondu zuten lekua, eta bertan atrezzoa, photocall-a eta 2024ko kopa ipini. Bertan, familiek zortzi argazki baino gehiago egiteko aukera izan zuten, eta argazki-oroigarriak etxera eraman zituzten. “Aretoa magiaz eta bakarrik futbolak sortu dezakeen berotasunaz bete zen, derioztarren batasuna eta zaletasuna beste behin agerian utziz. Derioko familiek Athletic babesten duten erakuslea izan zen atzoko ekintza, baina, halaber, zale derioztarrak batzeko modu ederra izan zen. Eskerrak eman nahi dizkiegu ekintzan parte hartu zuten guztiei, topaketa une ahaztezina bihurtu zuten eta”.